kab se - papa

meri soch me kahin tha
ke ek din aayega jab
tum nahin rahoge
hoge mere aaspaas
meri ragoN me
reet nibahaney ko hi chaahe
tum nahin rahoge


ab nahin ho
nahin ho kar bhi
yahin ho
meri sochon me
bachpan kii maujoN me
kissey sunatey
hanstey hansatey
yahin kahin ho

kho kar bhi
kuchh bhi
poori tarah nahin khota
saath reheta hai
muskurata hai
jeevan ka satya
pratidin batata hai
jaaney ke baad
adhik yaad aata hai

kuchh tou beeta hai

kuchh tou beet gaya hai jaaney
thehrii thehrii lagti ghadiyaN
holi me koi rang nahin tha
naye saal ka dhang nahin tha
bina tumhare kat-te hai din
hissa rooth gaya hai jaaney